/ رولو معمر بالكفتة والسبانخ /

المقادير
نصف كيلو كفتة
ملعقة كبيرة زيت بلدية
شوية ملح و ابزار
شوية تحميرة
ضرس ثوم محكوك
5 بيضات مسلوقين
نصف كيلو سبانخ مفورين أو مسلوقين في ماء و ملح و مصفيين و مشحرين في مقلة مع ملعقة كبيرة ديال الزيت البلدية أو زبدة و ابزار و نذوقو الملح الى خاصة نزيدوها و نخليوهم حتى ينشفو من الماء
الطريقة

نخلطو الكفتة مع الزيت و الثوم و الملح و البزار و التحميرة .ناخدو لاطة ديال الفران نفرشو فيها ورق سيلفيريزي و نطلقو فوقه الكفتة بالمدلك على شكل مستطيل ثم نسرحو السبانج فوق الكفتة و نخليو شوية ديال الفراغ من الجناب ثم نستفو البيض مسلوق بيضة جنب بيضة فوق السبانخ على الحافة ديال المستطيل و نبداو نهزو الورق و نلويو على شكل رولو و منين نكملو نلويو عليها الورق و نسدوه من الجوانب و نعاودو نغطيوه مزيان بورق الألومنيوم ثم نحطوه فوق اللاطة و ندخلوه للفران يطيب مدة 30 دقيقة هو غذي يطلق الماء ديالو و منين يخرج من الفران يبقى حتى يبرد ثم نقطعوه طرانش كيجي فيه منظر جميل و ألوان مختلفة 
بالنسبة للماء اللي غذي يطلق منين نحلو الورق نزولو الماء و نديروه في كسرونة مع شوية النشا أو دقيق و نبقاو نحركو حتى يختار الى خاص الملح و البزار نزيدوهم و نقدمو الصلصة مع الرولي

طبق مرافق

نقطعو الكرعة الخضراء دوائر و نديروها في مقلة مع الزيت البلدية و ضرس ثوم محكوك و شوية الملح و البزار و مرة مرة نهزو المقلة و نحركو دون استعمال الملعقة حتى تطيب الكرعة و لا حاجة لاضافة الماء.